Á þriðja áratug síðustu aldar hóf flóabáturinn Baldur siglingar um fjörðinn með fólk, vörur og póst og Konráð, skip Kaupfélagsins í Flatey sigldi hér einnig um í sömu erindagjörðum. Í dag skilar Breiðafjarðaferjan Baldur fullfermi ferðafólks tvisvar á dag upp á strendur hreppsins yfir sumartímann og margir koma landleiðina úr suðri eða norðri.

Fáir stoppa þó. Jafnvel þó að þeir gisti orlofshús eða aðra gististaði á Barðaströnd þá leita þeir langt yfir skammt, og eðlilega – þeir vita ekki hvað Barðastrandarhreppurinn hefur upp á að bjóða annað en e.t.v. það augljósasta – fjöruna. Hér skal bætt úr því. Vissulega eru spennandi staðir hér í kring, öll Vesturbyggð hreint út sagt. En hér er fókusinn á Barðastrandarhreppinn. Til þess var leikurinn gerður fyrir um áratug síðan og af honum hefur sprottið mikil vinna með heimamönnum og öðrum er lagt hafa verkefninu lið.

Bók, kort og nú vefur byggir á samvinnu höfundar við heimamenn um landsvæði þeirra. Einnig samvinnu við Kristbjörgu Olsen myndlistakonu um teikningu korts, íkona og hönnun vefs, Björgu Vilhjálmsdóttur hönnuð um hönnun bókar og korts og teikningu á línumynd á vefsíðu, Ólaf Valson kortagerðarmann um göngukort inni í bók, Guðlaugu Einarsdóttur systur mína um atriðaorðaskrá, Berglindi Steinsdóttur með prófarkalestur, Hannes Björnsson manninn minn um þýðingu á enskum texta, Prentsmiðjuna Odda hf um prentun og setningu bókar og korts (Ási og Árni þar fremstir í flokki jafningja) og fjöldan allan af fólki sem gegnið hefur með mér um Barðastrandarhrepp síðasta áratuginn eða svo. Stuðningsaðilum verkefnisins, svo og öllu þessu fólki færi ég kærar þakkir.